Ճաշասենյակը այն վայրն է, որտեղ անցնում են ընտանեկան ջերմ հավաքույթները։ Հաճախ հենց այստեղ են ծնվում անմոռանալի պահերն ու ամենաջերմ հուշերը։ Տարածքի կահավորումից և ձևավորումից են կախված նաև ճաշասենյակի մթնոլորտը, օգտագործման հարմարավետությունը և ընտանեկան հաղորդակցման որակը։
Երբ կահավորումը արված է մտածված , ապա ճաշասենյակը կարող է ծառայել ոչ միայն որպես ֆունկցիոնալ տարածք, այլև հաճելի միջավայր, որտեղ հանգստանում , շփվում և ջերմ հուշեր են կերտում տան տերերը։
Ճաշասենյակի կահավորումը խորհուրդ է տրվում սկսել տարածքի գնահատումից։ Առաջին հերթին պետք է ուշադրություն դարձնել սենյակի չափսերին, հասկանալու համար, թե ինչ ծավալի կահույք կարող է օգտագործվել այնտեղ, որն էլ իր հերթին հնարավորություն կստեղծի ապահովել սենյակի ընդարձակությունն ու շարժման հարմարավետությունը։
Ճաշասենյակի կարևորագույն տարրերից են սեղանը և աթոռները։ Շատ կարևոր է, որպեսզի ճաշասեղանը լինի ընդարձակ։ Նրա տեսքն ու ոճը նույնպես կարևոր դեր են խաղում սենյակի ընդհանուր մթնոլորտի վրա։ Փայտյա դասական սեղանները հաղորդում են ջերմություն և էլեգանտություն, իսկ ժամանակակից ապակյա, քարե կամ մետաղյա տարբերակները ՝ հստակություն և պարզություն։ Ճաշասեղանի ձևը ևս կարող է խորհրդանշանակ լինել։
Օրինակ՝ Կլոր սեղանները ստեղծում են հավասարության և մտերմության զգացողություն։ Նրանք նպաստում են անկեղծ զրույցներին, ընկերական մթնոլորտին և համերաշխությանը։
Օվալ կամ ուղղանկյուն սեղանները ավելի հարմար են մեծ ընտանիքների կամ տոնական հյուրասիրությունների համար, քանի որ թույլ են տալիս իրենց շուրջը տեղավորել ավելի շատ մարդկանց և կազմակերպել սպասքի գեղեցիկ դասավորվածություն։
Քառակուսի սեղանները համեմատաբար փոքր են և կարող են ծառայել ինչպես ռոմանտիկ երեկոների , այնպես էլ ընտանեկան շատ փոքր խմբերի համար։ Այս տեսակ սեղանները հաճախ օգտագործվում են սրճարաններում և տարբեր ժամանցի կենտրոններում։
Աթոռները իրենց հերթին ևս պետք է լինեն հարմարավետ, հատկապես եթե ընթրիքը երկար է տևում։ Նրանց տեսքն ու ոճը մեծապես ազդում է սենյակի ամբողջական դիզայնի վրա։ Ճաշասենյակը լիարժեք կարող է համարվել միայն այն ժամանակ, երբ սեղանի շուրջ դրված են հարմար և ներդաշնակ աթոռներ։
Ճիշտ ընտրված աթոռները ոչ միայն ապահովում են հարմարավետություն, այլև նպաստում են ինտերիերի ամբողջականությանը։ Երբ նյութն ու ձևը համապատասխանում են ընդհանուր ոճին, ապա ճաշասենյակը դառնում է ոչ միայն օգտակար, այլ նաև հաճելի և ոգեշնչող վայր։
Ճաշասենյակում սեղանից և աթոռներից զատ կարող է տեղ գտնել նաև այլ կահույք, որը թե ֆունկցիոնալ, թե դեկորատիվ, և թե ակցենտային նշանակություն կունենա։ Ահա մի քանի հիմնական տեսակներ, որոնք կարելի է օգտագործել ճաշասենյակի կահավորման համար․
1. Ցածր սպասքապահարան կամ կոմոդ
Այն կարող է օգտագործվել որպես դեկորատիվ տարրերի տեղադրման վայր, ինչպիսիք են ՝ լամպեր, մոմեր, ծաղկամաններ, տարբեր տիպի աքսեսուրներ, այնպես էլ հիանալի տարբերակ է առաջին օգտագործման անհրաժեշտ պարագաները պահելու համար։
2. Բարձր սպասքապահարան
Այն ծառայում է որպես սպասքի, բաժակների և այլ դեկորատիվ պարագաների ցուցադրության տարր։ Սպասքապահարանները կարող են լինել բաց կամ ապակեպատ դռներով ՝ դառնալով նաև դեկորատիվ էլեմենտ ճաշասենյակում։
3. Հայելի
Ճաշասենյակում հայելին կարող է տեսականորեն մեծացնել տարածքը և հաղորդել հավելյալ լույս։
4. Գինու պահարան կամ բառ-պահարան
Եթե գինու կամ խմիչքների սիրահար եք, ապա բառ–պահարանը ՝ տեղակայված սենյակի անկյունում, կհաղորդի նրան առանձնահատուկ շքեղություն և հարստություն։
5. Էտաժեր
Կարելի է օգտագործել դեկորատիվ սպասք, գրքեր, ծաղիկներ և աքսեսուարներ ցուցադրելու համար։ Այս տեսակը ավելի համահունչ է մինիմալիստական կամ սկանդինայան ոճերի հետ։
6. Լուսավորություն
Ճաշասենյակի լուսավորությունը կարելի է ապահովել թե ջահերով, թե լամպերով և թե հատակի լուսատուներով։ Վերջինները կընդգծեն սենյակի ոճը և կհաղորդեն նրան առանձնահատուկ ջերմություն։
Ժամանակակից աշխարհում, որտեղ մարդիկ հաճախ շտապում են և քիչ ժամանակ են անցկացնում ընտանիքի հետ, ճաշասենյակը դառնում է կարևոր տարածք։ Ճաշասենյակի կահավորումը չպետք է դիտվի որպես միայն ինտերիերի հարց, այլ ՝ որպես ընտանեկան արժեքների արտահայտություն։